Layihə haqqında
Azərbaycan İnvestisiya Şirkəti (AİŞ) qeyri-neft sektorunun inkişafının dəstəklənməsi məqsədilə strateji dövlət investisiya aləti kimi Azərbaycan Respublikası Prezidentinin 30 mart 2006-cı il tarixli Sərəncamı ilə yaradılmışdır. Şirkətin yaradılması ölkədə iqtisadiyyatın dayanıqlı şaxələndirilməsinə və özəl sektorun uzunmüddətli inkişafına yönəlmiş müasir investisiya mexanizminin formalaşdırılmasına imkan vermişdir.
AİŞ-in əsas məqsədi qeyri-neft sektorlarında fəaliyyət göstərən səhmdar cəmiyyətlərdə və digər kommersiya qurumlarında pay və səhmlərin əldə edilməsi yolu ilə uzunmüddətli investisiyaların həyata keçirilməsidir. Şirkət öz fəaliyyəti vasitəsilə dövlətin investisiya siyasətinin icrasına dəstək verir, sahibkarlığın inkişafını stimullaşdırır və dövlət–özəl sektor əməkdaşlığının balanslaşdırılmış şəkildə formalaşmasına töhfə verir.
AİŞ-in investisiya fəaliyyəti daxili kapital bazarının inkişafına, korporativ idarəetmə standartlarının təşviqinə, həmçinin pay və borc alətlərinin buraxılışının dəstəklənməsinə mühüm töhfə verir. Şirkətin investisiya fəaliyyətindən əldə olunan dividendlər dövlətə köçürülür və dayanıqlı fiskal gəlirlərin formalaşmasına xidmət edir.
Azərbaycan İnvestisiya Şirkəti dövlətə məxsus qurum kimi fəaliyyət göstərir və onun nizamnamə kapitalı dövlət tərəfindən formalaşdırılmışdır.
SOFAZ-ın iştirakı
Azərbaycan Respublikası Dövlət Neft Fondu (SOFAZ) Azərbaycan İnvestisiya Şirkətinin nizamnamə kapitalının formalaşdırılmasını Azərbaycan Respublikası Prezidentinin 30 mart 2006-cı il tarixli Sərəncamınauyğun olaraq büdcə xərci kimi maliyyələşdirmişdir.
SOFAZ tərəfindən ayrılmış vəsaitlər AİŞ-in nizamnamə kapitalının yaradılmasına yönəldilmiş və Fond Şirkətin investisiya fəaliyyətindən əldə olunan dividendlərin benefisiarı kimi çıxış edir.
Yaradılma ili: 2006
SOFAZ tərəfindən nizamnamə kapitalına ayırma: 2006-cı il – 90,0 mln AZN