Layihə haqqında
2019–2023-cü illər üçün Ali təhsil sisteminin beynəlxalq rəqabətliliyinin artırılması üzrə Dövlət Proqramı Azərbaycanın ali təhsil sisteminin gücləndirilməsi, beynəlxalq mövqeyinin yüksəldilməsi və qabaqcıl elmi-tədqiqat potensialının inkişaf etdirilməsi məqsədilə hazırlanmışdır.
Proqram xaricdə doktorantura təhsilinin dəstəklənməsinə və aparıcı xarici ali təhsil müəssisələri ilə əməkdaşlıq çərçivəsində beynəlxalq ikili diplom proqramlarının icrasına yönəlmişdir. Bu yanaşma bilik transferinə və Azərbaycanın ali təhsil sisteminin qlobal akademik mühitə inteqrasiyasına töhfə verir.
Proqram 16 noyabr 2018-ci il tarixli, 711 nömrəli Prezident Sərəncamı ilə təsis edilmiş və Azərbaycan Respublikasının Təhsil Nazirliyi yanında Dövlət Proqramının İdarəetmə Qrupu tərəfindən icra olunur. Nazirlik proqramın ümumi koordinasiyasını, monitorinqini və nəzarətini həyata keçirərək təsdiq edilmiş qaydalara riayət olunmasını, icranın şəffaflığını və milli prioritetlərə uyğunluğunu təmin edir.
Prioritet doktorantura ixtisasları, iştirakçıların seçim prosedurları və beynəlxalq ikili diplom proqramlarının çərçivəsi Azərbaycan Respublikası Nazirlər Kabinetinin qərarları ilə təsdiq edilmişdir.
Proqram çərçivəsində iştirakçıların təhsil haqları, yaşayış xərcləri, yol, viza və sığorta xərcləri, habelə proqramın icrası ilə bağlı inzibati xərclər maliyyələşdirilir.
SOFAZ-ın iştirakı
Dövlət Proqramının maliyyələşdirilməsi Dövlət büdcəsi, o cümlədən Azərbaycan Respublikası Dövlət Neft Fondunun (SOFAZ) vəsaitləri və digər qanuni mənbələr hesabına həyata keçirilir. SOFAZ Təhsil Nazirliyi tərəfindən təqdim olunan rəsmi müraciətlər və təsdiq edilmiş xərc smetaları əsasında proqramın icrasında büdcə xərci kimi iştirak edir. Ayrılmış vəsaitlərin istifadəsi Dövlət büdcəsinin icrası çərçivəsində və müəyyən edilmiş maliyyə nəzarəti prosedurlarına uyğun olaraq həyata keçirilir.
İnteraktiv qrafik
SOFAZ tərəfindən ümumi ayırma (30 sentyabr 2025 tarixinə): 106,6 mln AZN(o cümlədən 2007–2015-ci illər üzrə Dövlət Proqramına aid 1,0 mln AZN geriödəmə)