Layihə haqqında
Beynəlxalq ikili diplom proqramları təşəbbüsü qabaqcıl elmi nailiyyətlərdən və innovativ tədris-təlim texnologiyalarından istifadə etməklə yeni nəsil yüksək ixtisaslı mütəxəssislərin hazırlanmasını hədəfləyir. Proqram Azərbaycan Respublikasında ali təhsil sisteminin məzmun və keyfiyyət göstəricilərinin müasirləşdirilməsinə, habelə transmilli təhsil modellərinin tətbiqinə töhfə verir.
Azərbaycan Respublikası Prezidentinin 16 noyabr 2018-ci il tarixli, 711 nömrəli Sərəncamı ilə təsdiq edilmiş “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”na uyğun olaraq hazırda altı beynəlxalq ikili diplom proqramı icra olunur. Bu proqramlar inkişaf etmiş təhsil sisteminə malik ölkələrin ali təhsil müəssisələri ilə əməkdaşlıq çərçivəsində həyata keçirilir və beynəlxalq reytinqlərdə yüksək mövqelərə malik universitetlərə üstünlük verilir.
Beynəlxalq ikili diplom proqramlarının genişləndirilməsi yüksək intellektual potensiala və liderlik keyfiyyətlərinə malik istedadlı Azərbaycan vətəndaşlarının beynəlxalq akademik təcrübə qazanması üçün imkanlar yaradır, eyni zamanda birgə elmi və tədqiqat fəaliyyətlərinin inkişafını təşviq edir.
Azərbaycan Respublikası Konstitusiyasının 109-cu maddəsinin 32-ci bəndinə əsasən qəbul edilmiş yeni Prezident Sərəncamı ilə “2022–2026-cı illər üçün Azərbaycan Respublikasının Sosial-İqtisadi İnkişaf Strategiyası”na uyğun olaraq beynəlxalq ikili diplom proqramlarının sayının səkkizə çatdırılması və bu proqramların icrasının 2030-cu ilədək təmin edilməsi nəzərdə tutulur.
Nazirlər Kabineti xarici tərəfdaş universitetlərin, akademik proqramların və təhsil səviyyələrinin seçilməsi qaydalarının təsdiq edilməsi, maliyyələşmə mexanizmlərinin müəyyənləşdirilməsi və icra üzrə fəaliyyət planının qəbul edilməsi ilə bağlı səlahiyyətlərə malikdir. Elm və Təhsil Nazirliyi isə proqramların seçilməsi, koordinasiyası və SOFAZ ilə birgə hər il tələb olunan maliyyə vəsaitinin müəyyən edilməsi üçün məsul qurumdur.
SOFAZ-ın iştirakı
Prezidentin 836 nömrəli Fərmanı ilə nəzərdə tutulmuş tədbirlərin maliyyələşdirilməsi Azərbaycan Respublikasının Dövlət Neft Fondu (SOFAZ) tərəfindən təmin edilir.
Fərmana uyğun olaraq SOFAZ layihənin icrası üçün tələb olunan maliyyə vəsaitini illik təsdiq edilmiş büdcəsi çərçivəsində ayırır. Bu vəsaitlər 2026–2030-cu illər ərzində yeni peşə təhsili müəssisələrinin tikintisinə və mövcud obyektlərin əsaslı təmirinə yönəldilərək ölkə üzrə dayanıqlı və müasir peşə təhsili infrastrukturunun formalaşdırılmasına xidmət edir.
SOFAZ-ın layihədə iştirakı insan kapitalının uzunmüddətli inkişafını dəstəkləyir, peşə təhsili ilə əmək bazarının tələbləri arasında uyğunluğu gücləndirir və Azərbaycan iqtisadiyyatının qeyri-neft sektorunun dayanıqlı inkişafına töhfə verir.
Layihənin başlanma tarixi: 2026