Cənub Qaz Dəhlizi

Layihə haqqında

Cənub Qaz Dəhlizi (CQD) Azərbaycanın Xəzər dənizində yerləşən Şahdəniz qaz yatağından Cənub-Şərqi Avropa ölkələrinə qaz tədarükünü həyata keçirən boru kəməri sistemidir. Layihə Xəzər dənizindəki dəniz qaz hasilatını transmilli boru kəməri şəbəkəsi ilə birləşdirərək Avropaya uzunmüddətli, etibarlı və iri həcmli təbii qaz tədarükünün təmin olunmasına xidmət edir.

Layihə Şahdəniz qaz-kondensat yatağının tam miqyaslı işlənməsini (Mərhələ 2), eləcə də əsas boru kəməri infrastrukturunun tikintisini və istismarını əhatə edir. Cənubi Qafqaz Boru Kəmərinin Genişləndirilməsi (CQBKG) Azərbaycan və Gürcüstan ərazisindən keçməklə 692 km uzunluğa və illik 24,04 mlrd kubmetr ötürmə gücünə malikdir. Trans-Anadolu Boru Kəməri (TANAP) isə 1 812 km uzunluğa və 17,5 mlrd kubmetr ötürmə gücünə sahib olmaqla, Gürcüstan–Türkiyə sərhədində Cənubi Qafqaz Boru Kəməri, Türkiyə–Yunanıstan sərhədində isə Trans-Adriatik Boru Kəməri ilə birbaşa əlaqə yaradır.

Trans-Adriatik Boru Kəməri (TAP) 878 km uzunluğa və 11,5 mlrd kubmetr ötürmə gücünə malik olmaqla, Türkiyə–Yunanıstan sərhədində TANAP ilə birləşir və Yunanıstan, Albaniya və Adriatik dənizi vasitəsilə qazı İtaliyanın cənubuna çatdırır.

“Cənub Qaz Dəhlizi” Qapalı Səhmdar Cəmiyyəti (“CQD” QSC) Azərbaycan Respublikası Prezidentinin 25 fevral 2014-cü il tarixli 287 nömrəli Sərəncamına əsasən, prioritet milli enerji təşəbbüsü kimi təsis edilmiş və həyata keçirilmişdir. Cəmiyyətin 49 faizi dövlətə (Azərbaycan Respublikası İqtisadiyyat Nazirliyi tərəfindən təmsil olunur), 51 faizi isə SOCAR-a məxsusdur. Bu təşəbbüs Azərbaycanın etibarlı enerji təchizatçısı kimi rolunun möhkəmləndirilməsinə və regionda enerji təhlükəsizliyinin artırılmasına yönəlmişdir. Hazırda Azərbaycan təbii qazı tamamlanmış infrastruktur vasitəsilə Avropa bazarlarına çatdırılır.

ARDNF-nin iştirakı

Azərbaycan Respublikasının Dövlət Neft Fondu (ARDNF) dövlətin Cənub Qaz Dəhlizində iştirak payının maliyyələşdirilməsini “Cənub Qaz Dəhlizi” QSC-nin nizamnamə kapitalında dövlət payının maliyyələşdirilməsi və müvafiq Prezident Sərəncamına əsasən şirkətə uzunmüddətli borc maliyyələşməsi (korporativ istiqrazlar) təqdim etməklə təmin etmişdir. ARDNF layihənin idarəetməsində Müşahidə Şurasında təmsil olunmaqla iştirak edir və dövlətin payına düşən gəlirlərin benefisiarı qismində çıxış edir.